PremyeDivizyon

Don Bosco de Pétion-ville frape yon gwo kou nan chanpyona nasyonal espesyal la aprè li fin domine Racing Club Haïtien ak yon viktwa klè (2-0) nan Parc Sainte-Thérèse la. Rezilta sa a mete "Mechan Mechan" nan tèt gwoup Lwès la ak 4 pwen, Racing sou bò pa l ap kontinye trennen nan yon move seri ki sanble pako ap fini.

Depi kòmansman match la, Don Bosco te montre li genyen kontwòl jwèt la. Ekip Petyonvil la te mete anpil presyon sou defans Racing lan epi te chèche mete rit nan match la. Premye gwo aksyon an rive nan 32èm minit, kote Jorking Auguste resevwa yon bon balon aprè yon koufran ki te egzekite rapid epi frape san ezitasyon pou bay Don Bosco avantaj la (1-0).

Aprè sa, Racing te eseye monte nivo a, men atak yo pa t twò òganize epi yo rate kèk bon okazyon. Nan dezyèm mitan an, Don Bosco pa t bese vitès li. Ekip la te kontinye chèche kraze tout espwa Vye Lyon yo. Aprè anpil bon sekans se Derival Wisner, ki te sòti sou ban an, ki double avans la nan 72èm minit pou mete chif final la (2-0).

Racing Club Haïtien ap viv yon move peryòd chak fwa l ap jwe kont Don Bosco. Depi 2017, "Vye Lyon yo" pa janm ka bat ekip petyonvilwa a. Dènye fwa yo te fè sa, se te yon bèl viktwa (3-0). Men depi jou sa a, bagay yo pa janm mache pou yo : 8 match san yo pa ka ranpòte yon sèl viktwa kont Don Bosco.

Defèt sa a mete plis presyon sou Racing ki sot fete 102 lane egzistans 23 mas pase a, yo dwe jwenn solisyon pou kase move seri sa a si ekip la vle evite yon lòt sezon difisil li dwe reponn vit sou teren an nan pwochen match yo kont Violette AC.

Avèk 3 pwen viktwa sa a yo pran jodia, Don Bosco monte an premye pozisyon nan gwoup Lwès la ak 4 pwen, aprè yo te fè (1-1) kont VAC wikenn pase a.

KÒMANTÈ

Dènye atik yo