SeleksyonNasyonal

Jodi a fè egzakteman yon semèn depi seleksyon nasyonal Ayiti a rive reyalize yon eksplwa tèt chaje: kalifikasyon pou Koup Dimond lan, gras ak yon viktwa (2-0) sou Nikaragwa ak yon match nil (0-0) ant Kostarika ak Onndiras. Yon rezilta ki make dezyèm kalifikasyon Ayiti nan listwa l aprè premye patisipasyon li an 1974.

Men si kalifikasyon 1974 la te make yon epòk, eksplwa 2025 la pote yon dimansyon espesyal : Ayiti rive nan Mondyal la san li pa jwe yon sèl match lakay li.

Depi lane 2021, Ayiti pa jwe okenn match sou tè li akoz ensekirite ki paralize tout peyi a. Yon klima ki pa pèmèt òganizasyon rankont match entènasyonal. Tout match eliminatwa yo te jwe deyò peyi a, sou teren Kiraso, Babad, Repiblik Dominikèn oswa lakay advèsè yo.

Se konsa Ayiti antre nan listwa kòm premye nasyon ki kalifye pou yon Mondyal san li pa janm jwe lakay li pandan tout eliminatwa yo. Yon bagay ki montre nivo disiplin, solidarite ak detèminasyon seleksyon an.

Eksplwa sa a rive nan yon peryòd kote Ayiti ap travèse youn nan pi gwo kriz li yo :
– Gwo pwoblèm ensekirite
– Gang k ap miltipliye
– Popilasyon ki deplase
– Lekòl ak lopital ki fonksyone ak difikilte
– Enstitisyon Leta yo ki febli, pou n pa di ki pa egziste

Nan tout doulè sa yo, Grenadye yo tounen yon sous lespwa, yon prèv malgre dezòd la, toujou gen yon bagay pozitif ki ka leve pou ini pèp la.

Depi sèt jou, Ayiti ap viv yon moman fyète kolektif. Nan katye yo, nan radyo, sou rezo sosyal, nan dyaspora a, moun yo kontinye pale de kalifikasyon an. Nou fè l san lakay, san sipò piblik, san okenn avantaj. Nou fè l pou drapo a. Se plis pase yon viktwa : se yon mesaj rezistans.

Sa seleksyon an fè a montre kapasite pèp ayisyen an lè li ini, lè li motive, lè li deside rive lwen menm lè tout bagay kont li. Kalifikasyon sa a se pa sèlman yon eksplwa espòtif, men yon viktwa moral, yon reyalizasyon ki raple Ayiti gen fòs pou leve menm nan pi gwo fè nwa.

Ayiti kalifye san li pa janm jwe lakay li. Men Ayiti jwe pou tout moun ki lakay li.