SeleksyonNasyonal

FIFA pibliye nouvo klasman li, ayè mèkredi 19 novanm nan, seleksyon nasyonal Ayiti a fè yon bon monte ladan l. Aprè de (2) viktwa kle kont Kostarika (1-0) ak Nikaragwa (2-0) pandan match kalifikasyon yo, Grenadye yo pase soti nan 88èm pou rive nan 84èm plas mondyal la, ak yon total 1 294,49 pwen. Yon monte ki montre klèman pwogrè ekip la ap fè sou sèn foutbòl entènasyonal la.

Pwogrè sa a vin pran plis valè toujou paske li vini aprè yon kalifikasyon istorik pou Koup Dimond 2026 la, dezyèm fwa Ayiti ap patisipe nan yon Mondyal aprè 1974. Se yon etap ki make tout yon jenerasyon, epi ki retounen mete peyi a sou kat foutbòl Mondyal la.

Nan zòn CONCACAF la, Ayiti okipe 9èm plas, dèyè Kiraso (82èm ak 1302,7 pwen) epi devan Gwatemala (94èm ak 1245,77 pwen). Sa konfime se pa yon aza : seleksyon an ap monte, ap grandi, ap bati yon ekip ki kapab batay ak pi gwo ekip nan rejyon an.

Malgre kriz politik, enstabilite, manke estrikti ak enfrastrikti espòtif nan peyi a, jwe foutbòl vin tounen yon zouti rezistans. Jwè yo ak manadjè teknik yo rive pran difikilte yo pou fè fòs, pote bay pèp la yon ti limyè espwa ak fyète nan yon moman kote peyi a gen anpil chay pou pote.

Okenn klasman pa janm jis yon seri chif. Monte Ayiti nan klasman FIFA a se prèv yon ekip ki ap goumen, ki gen lespri kolektif, ki toujou pare pou siprann. Grenadye yo montre yon fwa ankò foutbòl la rete youn nan pi gwo motè inite ak enspirasyon nan peyi a, menm lè tan yo difisil.