Mondyal

Billy Gilmour, youn nan jwè ki pi enpòtan nan seleksyon ekosèz la, p ap patisipe nan Koup Dimond 2026 la. Mitan teren SSC Napoli a pran yon blesi nan jenou li jodi samdi an pandan match zanmitay Ekòs te genyen 4-1 kont Kiraso.

Federasyon foutbòl Ekòs la konfime pandan jounen an blesi sa a ap anpeche jwè a patisipe nan Mondyal lan e tou anonse Gilmour pral retounen nan klèb li pou kòmanse pwosesis reyabilitasyon l.

Se yon gwo pèt pou Ekòs, ki se premye advèsè seleksyon nasyonal ayisyèn lan pandan Koup Dimond 2026 la. Grenadye yo ap gen pou rantre nan konpetisyon an 13 jen k ap vini la kont seleksyon ekosèz lan ki pou kounya pral kòmanse panse ak yon ranplasan pou Gilmour.

Billy Gilmour se yon jwè ki gen kapasite pou òganize jwèt la epi fè lyen ant defans ak atak la, sa ki fè absans li an kapab gen yon enpak sou ekip la pandan Mondyal la.