Ekspatriye

Zetwal yo pa sispann etenn. A sèlman 17 lane, Elijah Lemeuble ki se yon ansyen jwè ekip jèn Ayiti yo pèdi lavi l samdi 11 avril pase a nan yon kondisyon trajik ki mete fanmi l nan gwo doulè ak lapèn.

Jèn atlèt sa ki t ap pare l pou rantre nan inivèsite Huston-Tillotson pou al kontinye jwe foutbòl epi etidye an menm tan, finalman wè tout rèv sa yo brize avèk lanmò sa ki rive nan Wildwood Park ki twouve l Jòji.

Daprè otorite yo, ansyen Grenadye an ta nwaye nan yon pisin ki twouve l nan Pak lan. Yon gwoup plonjè ta tonbe sou kò Elijah Lemeuble san vi nan pisin lan anviwon 30 minit aprè.

« Mwen gen enpresyon m ap viv yon move rèv m poko janm ka leve nan dòmi », se konsa youn nan ansyen kamarad li yo te reyaji aprè nouvèl lanmò sa.

N ap raple, Elijah Lemeuble te reprezante Ayiti nan yon tounwa U16 ki te fèt nan lakou Gwadloup pandan lane 2025 lan. Menmsi l vwayaje twò vit, Elijah Lemeuble ap rete grave pandan lontan nan memwa sila yo ki te kwè nan talan li yo.