SeleksyonNasyonal

Nan kad preparasyon pou gwo match Grenadyè yo kont Repiblik Dominikèn vandredi k ap vini an, seleksyon fanm Ayiti a resevwa plizyè nouvo jwez pou ranplase kèk ki pa t ka vin nan rasanbleman an nan Gwadloup.

Defansè Stade de Reims la, Jasmine Vilgrain, ansanm ak ansyen Grenadyè U-17 la, Nya Jean-Baptiste, jwenn apèl pou entegre ekip nasyonal la. Cassandra Décombe ak Naïla Louissaint fè egalman pati lis la.

Nouvo konvokasyon sa yo gen de objektif : konble absans yo epi bay lòt jwez opòtinite. Jenn defansè 16 lane a, Nya Jean-Baptiste, monte nan nivo granmoun apre bon pèfòmans li ak seleksyon U-17 la mwa ki sot pase an.

Daprè enfòmasyon nou genyen, Nya Jean-Baptiste ak Jasmine Vilgrain rive nan Gosye depi ayè samdi an e yo deja disponib pou antrenè Pia Sundhage, ki te gen yon mank jwez nan gwoup la. Cassandra Décombe ak Naïla Louissaint yo menm ta sipoze rive jodi dimanch lan.