PremyeDivizyon

Pou premye sezon Ligue haïtienne football lan (LHF), Télévision nationale d'Haïti gen dwa pou retransmèt match chanpyona nasyonal premye divizyon yo aprè yon akò ki jwenn ant pati yo.

Nan yon kominike ofisyèl, LHF lan anonse televizyon leta a pral gen pou bay match yo andirèk pandan sezon 2025-2026 lan. Chanpyona nasyonal lan ap gen demare jodi samdi an avèk yon rankont ant Racing Club Haïtien (RCH) avèk Juventus nan Parc Sainte Thérèse.

Nan kominike sa, Ligue haïtienne football lan presize akò pou TNH retransmèt match chanpyona nasyonal premye divizyon yo sezon sa se pou yon ti bout tan. Nan konferans pou laprès ki fèt ayè vandredi an, Sekretè jeneral LHF lan, Madam Marie Élise Obas, te fè konnen lig lan ap travay pou kapab genyen dwa retransmisyon yo.

Patenarya avèk TNH lan, daprè lig lan, rantre nan kad volonte pou fè pwomosyon yon chanpyona pwofesyonèl, k ap valorize imaj foutbòl ayisyen an, jwè ak klèb yo. Lig lan swete egalman ofri yon pi bon vizibilite medyatik ak bon jan prezantasyon konpetisyon nasyonal yo.

Apati 6è30 aswè an, nenpòt ki moun ap kapab rekòmanse gade chanpyona nasyonal lan atravè Télévision nationale d'Haïti ki gen dwa retransmisyon an jiskaprezan. N ap note, televizyon Leta a gen yon chèn YouTube ki aktif kote gen posiblite pou ta mete match yo tou.