ChampionsCup

Ekip meksiken an, Cruz Azul rive deja nan lakou Repiblik Dominikèn pou l jwe kont Real Hope FA nan kad premye tou Ligue des Champions CONCACAF la. Se yon match istorik pou Real Hope, paske se premye fwa y ap patisipe nan pi gwo konpetisyon klèb nan zòn CONCACAF la. Pou Cruz Azul, se tou yon match espesyal, paske li make premye egzamen antrènè Vicente Sánchez nan yon konpetisyon entènasyonal.

Real Hope FA, yon klèb ki sòti nan vil Okap, ap viv yon moman enpòtan nan listwa yo. Se premye fwa li rive nan CONCACAF Champions Cup, aprè li te fin pran chanpyona ayisyen an nan lane 2024. Klèb la ap eseye fè bèl figi kont Cruz Azul, ki se yon ekip ki genyen anpil eksperyans nan konpetisyon sa. Kapwa yo vle montre foutbòl ayisyen an kapab konpetitif sou sèn entènasyonal la.



Cruz Azul rive nan match sa ak yon nouvo antrenè, Vicente Sánchez, ki genyen anpil eksperyans kòm jwè, men ki ap fè premye pa li kòm antrenè nan yon konpetisyon entènasyonal. Ansyen atakan irigweyen an, ki te jwe pou Cruz Azul ak Club América, ap mennen ekip la ak lespwa pou l fè bon rezilta. Li vle montre li genyen kapasite pou gide ekip la lwen nan konpetisyon an.



Nan Konferans pou laprès antrenè 45 lane a deklare : “Konpetisyon sa trè enpòtan pou enstitisyon an. Nou pral jwe li ak tout seryozite li merite.”



Pou vwayaj sa, Sánchez deside mennen tout pi bon jwè li yo, sa ki montre li pa vle pran okenn risk. Men lis jwè ki fè vwayaj la:



• Gadyen: Gudiño, Mier, Ochoa



• Defansè: Campos, Ditta, Chiquete, Rivero, Vargas, Piovi



• Mitan teren: Faravelli, Montaño, Gutiérrez, García, Romero, Rodríguez, Morales, Valdivia, Durán



• Atakan: Sepúlveda, Giakoumakis, Fernández, Rotondi.



Lateral goch ajanten an, Gonzalo Piovi, ki pral jwe premye match li nan konpetisyon sa, montre ekip la motive : “Se yon match enpòtan pou nou. Se premye match mwen nan koup sa e mwen pral jwe l ak tout angajman. Nou vini pou defann koulè klèb la.” se sa li te deklare jodi a devan kamera laprès.



Match sa ka make listwa si Real Hope reyalize yon eksplwa kont Cruz Azul. Ekip ayisyen an ap konte sou sipò piblik la nan Cibao Stadium, kote match la ap jwe demen madi 4 fevriye a 8è nan aswè (lè Ayiti). Fanatik foutbòl ayisyen yo ap tann si Real Hope ka fè listwa epi mete Ayiti sou kat foutbòl CONCACAF la.

KÒMANTÈ

Dènye atik yo