ChampionsCup

Real Hope FA antre nan listwa foutbòl ayisyen jodi madi 4 fevriye a, lè li jwe premye match li nan CONCACAF Champions Cup kont Cruz Azul nan Cibao Stadium nan, an Repiblik Dominikèn. Malerezman, klèb ayisyen an pa t ka kenbe tèt ak eksperyans ekip meksiken an, li pèdi (0-2) nan match ale premye tou a.

Match la te kòmanse ak anpil entansite sou tou de bò yo, men se Cruz Azul ki te pi byen metrize match la. Real Hope te montre bon disiplin taktik pandan premye 30 minit yo, men li te manke presizyon nan konstriksyon aksyon li yo.



Malgre rezistans ayisyen yo, Angel Sepúlveda te jwenn premye gòl match la pou Cruz Azul nan 38èm minit aprè yon move degajman yon jwè Real te fè. Atakan meksiken an pa t ezite frape balon an nan antre sifas la pou l bat gadyen ayisyen an.



Nan dezyèm mitan an, Real Hope te eseye mete plis presyon, men li te difisil pou yo rive mete Cruz Azul an difikilte. Meksiken yo te kontwole rit match la epi yo te fini pa make dezyèm gòl la nan 83èm minit gras ak yon tèt Gabriel Fernández, aprè yon konè José Rivero te choute.



Malgre rezilta a, Real Hope FA ka fyè de premye eksperyans li nan konpetisyon sa. Yo te eseye kenbe tèt ak yon ekip ki genyen gwo eksperyans nan CONCACAF Champions Cup la. Anplis de sa, match la te yon bèl opòtinite pou jwè ayisyen yo fè eksperyans sou sèn entènasyonal la.



Aprè match sa, Real Hope ap genyen yon semèn pou prepare match retou a, ki ap jwe madi 11 fevriye a 10è nan aswè, nan estade Azteca nan Mexico City. Match sa ap difisil pou ekip ayisyen an, paske Cruz Azul genyen avantaj (2-0) sou total de match yo epi l ap jwe lakay li.



Real Hope FA ap bezwen yon ekslwa si li vle kontinye avanti li nan konpetisyon an. Fanatik foutbòl ayisyen yo ap tann pou wè si klèb kapwa a kapab bay meksiken yo yon gwo defi epi eseye fè listwa.

KÒMANTÈ

Dènye atik yo