Lòt

Nan kad match faz Eliminatwa Koup Dimond FIFA 2026 la nan zòn Amerik Disid la, seleksyon Brezil la fè yon bèl viktwa (2-1) sou Kolonbi. Men, sa ki atire plis atansyon, Brezil te fè 7 chanjman pandan match la, yon bagay nou pa konn wè. Ki jan sa te posib? Ki règ ki pèmèt sa? Nou pral gade sa an detay.

Match la te jwe nan Arena BRB Mané Garrincha a nan vil Brasilia, kapital peyi Brezil. Se te yon match enpòtan paske li te ka ede Brezil jwenn yon bon pozisyon nan klasman eliminatwa yo. Malgre Kolonbi te eseye reziste, Brezil te domine epi yo te ranpòte match la (2-1) gras ak 2 jwè k ap jwe nan Liga espanyòl la Raphinha epi Vinicius Júnior, pou advèsè li a se te Luiz Diaz.

Anvan, chak ekip te gen dwa sèlman ak 3 chanjman nan tout match yo. Men, aprè pandemi COVID-19 la, FIFA te deside ogmante kantite chanjman yo a 5. Rezon prensipal desizyon sa a se paske te gen twòp match ki t ap jwe youn aprè lòt, epi sa t ap ogmante risk pou jwè yo blese. Pou pwoteje sante yo, FIFA te fè règ sa yon bagay pèmanan nan tout konpetisyon yo.

Anplis 5 chanjman yo, gen yon lòt règ ki egziste : si yon jwè soufri yon blesi grav oswa li frape nan tèt (sa yo rele nan lang franse a "Commotion Cérébrale"), ekip li ka fè yon chanjman espesyal ki pa antre nan 5 chanjman yo. Se egzakteman sa ki te rive nan match Brezil - Kolonbi a.

Nan match la, gadyen Brezil la, Alisson Becker, te fè yon move chòk ak defansè Kolonbi a, Davinson Sánchez. Daprè règ FIFA yo, si yon jwè gen siy sa nou sot pale anlè a, li dwe kite tèren an pou evite danje pou sante li. Nan sans sa, Brezil te gen dwa fè yon chanjman espesyal.

Men sa ki pi enteresan an, règ FIFA a di : Si yon ekip fè yon chanjman espesyal pou komosyon sèvo, ekip advès la gen dwa fè yon chanjman tou, pou kenbe ekilib la. Se konsa, Kolonbi te pwofite ajoute yon chanjman anplis. Sa vle di, Brezil te fè 5 chanjman li yo. Yo te ajoute 1 chanjman espesyal pou Alisson sa fè 6. Aprè sa, yo te pwofite de chanjman Kolonbi te fè pou ajoute yon lòt chanjman ankò paske Davinson Sánchez sòti sou menm kòz ak gadyen brezilyen an, yo ajoute yon lòt ankò toujou pou kenbe ekilib la. Se konsa nou rive nan 7 chanjman pou Brezil.

Règ sou kantite chanjman nan foutbòl la chanje ak tan. Si jodi a ekip yo ka fè 5 chanjman olye de 3, se paske foutbòl la vin pi fizik epi kalandriye match yo pi chaje. Règ sou komosyon sèvo a pèmèt ekip yo pwoteje jwè yo san yo pa pèdi avantaj taktik yo. Nan match sa, se sa ki te pèmèt Brezil rive fè 7 chanjman. Yon bagay ra, men ki byen eksplike si nou konprann règ yo byen.

KÒMANTÈ

Dènye atik yo