Lòt

Defansè entènasyonal ayisyen an fèk siyen ak Westchester SC, yon klèb k ap evolye nan twazyèm divizyon ameriken an, USL League One. Siyati a te ofisyèlman anonse nan dat 22 janvye 2025 lan, aprè li te kite Valour FC nan Canadian Premier League la, an 2024

Andrew, ki te yon ajan lib, sa vle di ki pa t genyen klèb, depi li kite Valour FC, fèk retounen nan lakou Etazini, kote li te kòmanse karyè foutbòl li. Malgre sa, li sezi yon nouvo opòtinite, men nan yon nivo pi ba pase sa li te abitye a. Westchester SC se yon nouvo klèb ki pral kòmanse premye sezon li nan USL League One, se premye fwa klèb sa a ap jwe nan twazyèm divizyon an.



Se pa premye fwa Andrew te jwe nan yon lig ki pi ba. Li genyen eksperyans nan peyi Etazini ak nan lòt lig etranje tankou Syèd, kote li te jwe pou Nyköpings BIS an 2016 ak Umeå FC an 2019.



Klèb Westchester SC, ki baze nan New York, pran li kòm twazyèm nouvo jwè yo, aprè Joel Johnson ak Bryan Vásquez. Nan yon deklarasyon, Direktè Sportif klèb la, Simon Baines, te pataje objektif klèb la, ki se asire yo gen pwofondè ak eksperyans nan ekip la. "Twa nouvo jwè sa yo ap ede nou amelyore nan de aspè sa yo, e chak nan yo ap byen entegre nan estrikti n ap bati a."



Andrew Jean-Baptiste se yon defansè solid ki te jwe nan MLS e ki genyen anpil eksperyans sou sèn entènasyonal. Li espere pote enèji ak eksperyans li nan Westchester SC pandan premye sezon klèb la nan USL League One.



Foutbòl Ozetazini ap tann yon nouvo defi pou Andrew, ki genyen anpil potansyèl pou ede Westchester SC grandi nan nouvo pwojè sa.

KÒMANTÈ

Dènye atik yo