Lòt

Pandan anpil jèn an Ayiti ap chèche opòtinite pou devlope talan yo nan foutbòl, FC Toro kontinye ranfòse angajman li nan kominote a atravè pwogram fòmasyon ak deteksyon li yo.

Klèb la anonse lansman pwogram “Deteksyon 2026” li a, yon inisyativ ki vize idantifye epi akonpaye nouvo talan nan kategori U10, U12, U14, U16 ak U18. Enskripsyon yo ap fèt soti 3 pou rive 14 dawout, pandan sesyon deteksyon yo ap kòmanse nan semèn 24 dawout la.

Pou responsab FC Toro yo, objektif la depase senpman dekouvri bon jwè. Pwogram lan fè pati yon vizyon ki chita sou devlopman jèn yo, edikasyon atravè espò ak ranfòsman valè tankou disiplin, respè ak travay ekip.

Avèk slogan “Genyen plas ou”, klèb la vle ankouraje jèn yo konprann reyisit mande efò, detèminasyon ak angajman. Olye yo garanti yon plas davans, deteksyon yo bay tout patisipan yo menm chans pou montre kapasite yo sou tèren.

Nan kad pwosesis la, kandida yo ap gen pou soumèt plizyè dokiman, tankou yon kopi akdenesans, de foto idantite, yon dokiman lekòl oswa kat vaksinasyon. Frè enskripsyon an fikse a 500 goud epi li gen ladan yon mayo ofisyèl klèb la.

Depi plizyè ane, FC Toro ap sèvi kòm yon espas kote timoun ak adolesan yo kapab pratike foutbòl nan yon anviwònman ki òganize. Aktivite sa yo pèmèt anpil jèn rete aktif, devlope kapasite yo epi jwenn sipò nan yon kad ki favorize kwasans pèsonèl yo.

Nan yon peyi kote espò souvan reprezante yon sous lespwa ak motivasyon pou anpil fanmi, inisyativ tankou sa FC Toro ap mennen yo montre kijan klèb lokal yo kapab jwe yon wòl enpòtan nan devlopman kominote yo.

Avèk nouvo kanpay deteksyon sa a, FC Toro kontinye mache sou vizyon li ki se “Bati Eritaj Nou”, pandan l ap chèche prepare pwochen jenerasyon foutbolè ayisyen yo epi ofri yo plis opòtinite pou reyalize rèv yo.