SeleksyonNasyonal

Seleksyon nasyonal ayisyèn U-17 lan k ap gen pou jwe kòmansman mwa fevriye an eliminatwa CONCACAF pou Mondyal U-17 2026 lan genyen kòm antrenè Kovsky Saint-Vil. Federasyon an ofisyalize nouvèl lan ayè lendi 12 janvye an.

Nan yon kominike piblik, Federasyon ayisyèn foutbòl anonse ofisyèlman ansyen antrenè ASC an pral gen pou dirije seleksyon nasyonal U-17 gason an nan peyi Gwatemala k ap resevwa gwoup C an.

Aprè Eddy César ak Bruny Pierre Richard fin pèdi pòs yo nan tèt ekip lan, Federasyon an pral mize sou eksperyans Kovsky Saint-Vil pou mennen ti Grenadye yo yon lòt fwa ankò nan Mondyal.

N ap raple, ekip ayisyèn lan deja rasanble depi semèn pase nan kapital lan kote y ap antrene sou tèren Parc Sainte-Claire lan nan Tiplas Kazo.

Nan kalandriye ofisyèl lan, ti Grenadye yo ap gen pou jwe nan gwoup C an kont Gwatemala, Grenad epi Antigwa ak Babouda.