SeleksyonNasyonal

FIFA pote yon chanjman nan fason fenèt entènasyonal yo ap òganize apati ane 2026 la. Olye pou seleksyon yo jwe de (2) match nan mwa septanm epi retounen nan klèb yo anvan yon lòt rasanbleman nan mwa oktòb, nouvo kalandriye a bay posiblite pou plizyè rankont fèt youn dèyè lòt nan menm fenèt entènasyonal la.

Nan kad nouvo dispozisyon sa yo, Lig Nasyon Concacaf 2026-2027 la ap gen yon faz kote seleksyon yo pral jwe 4 match youn dèyè lòt. Fenèt sa ap jwe sòti 21 septanm pou rive 6 oktòb 2026, sa vle di jwè yo ap rete anviwon 16 jou ansanm ak seleksyon yo.

Tiraj Lig Nasyon Concacaf la ap fèt jodi jedi a pou detèmine konpozisyon gwoup yo ak advèsè diferan seleksyon yo. Apre tiraj sa a, Ayiti ap konnen 4 ekip li pral rankontre nan premye faz konpetisyon an.

Pou edisyon 2026-2027 la, Lig Nasyon Concacaf la ap toujou sèvi kòm youn nan pi gwo konpetisyon nan zòn nan. Li pèmèt seleksyon yo mezire nivo yo, jwenn plas pou Gold Cup la selon klasman yo, epi prepare ekip yo pou gwo defi entènasyonal yo.

Nan premye faz Lig Nasyon an, Grenadye yo pral gen pou yo fè fas ak 4 advèsè nan yon seri match ki pral fèt youn apre lòt. Rezilta rankont sa yo ap enpòtan anpil pou objektif Ayiti nan konpetisyon an, sitou nan yon peryòd kote ekip la ap chèche kontinye devlope epi jwenn plis estabilite.

Youn nan gwo avantaj nouvo fòma sa a ka pote pou seleksyon an se tan jwè yo ap pase ansanm. Lè yon ekip nasyonal reyini pou yon tan ki pi long, antrenè a gen plis posiblite pou travay sou sistèm jwèt la, mete prensip taktik yo an plas epi pèmèt nouvo jwè yo adapte yo ak gwoup la.

Pou Grenadye yo, ki gen anpil jwè k ap evolye nan diferan chanpyona atravè mond lan, plis jou ansanm kapab ede ranfòse konpreyansyon ant jwè yo sou teren an epi kreye plis otomatik nan ekip la.

Apre tiraj la, Ayiti pral konnen plis detay sou chemen li nan Lig Nasyon Concacaf 2026-2027 la ak defi ki ap tann li nan nouvo fòma konpetisyon an.