ChampionsCup

Yon semèn anvan yo jwe kont Real Hope nan CONCACAF Champions Cup la, Cruz Azul fè chanjman sou ban teknik li a, san sa pa t nan plan yo. Ansyen antrenè Martín Anselmi kite ekip la pou li ale nan FC Porto, epi se Vicente Sánchez ki pran plas li kòm nouvo antrenè

Cruz Azul, klèb meksiken an, ap viv yon peryòd chanjman enpòtan sou ban li an. Ansyen antrenè a, Martín Anselmi, ki se yon teknisyen ajanten 38 lane, deside kite ekip la pou li ale pran tèt FC Porto nan peyi Pòtigal. Depa li a kreye anpil diskisyon paske klèb meksiken an te vle mennen aksyon legal kont li paske l koupe kontra a pou kont li, li te menm aksepte pòs la an Ewòp san potko gen akò yo.



Pou ranplase li, Cruz Azul mete konfyans li nan Vicente Sánchez, yon antrenè irigweyen ki genyen 45 lane. Ansyen atakan sa a te deja travay nan estaf teknik ekip la epi li jwe pou klèb la nan tan pase yo. Kounye a, li resevwa misyon pou mennen "La Máquina" sou bon chimen.



Kòmansman li sou ban Cruz Azul la deja bay bon rezilta. Premye match li, 25 janvye ki sot pase a kont Puebla, te fini (1-1). Aprè sa, ekip li a fè 2 viktwa enpòtan sou teren 2 advèsè : (3-1) kont Necaxa 28 janvye a epi (3-2) kont Tijuana 31 janvye a. Tout match sa yo te jwe nan chanpyona meksiken an, Liga MX.



Avèk twa match san defèt sou ban an, Vicente Sánchez pare pou premye defi entènasyonal li. Demen, Cruz Azul pral jwe kont Real Hope nan CONCACAF Champions Cup la sou yon teren nan peyi Repiblik Dominikèn. Match sa a ap yon gwo tès pou nouvo antrenè a ak ekip li a, pandan yo ap chèche kontinye sou chimen bon rezilta yo.

KÒMANTÈ

Dènye atik yo