MondyalClub

Pandan sezon ete sa, sòti 14 jen pou rive 13 jiyè 2025 lan, FIFA ap òganize premye edisyon Koup Dimond klèb yo nan peyi Donald Trump ap dirije a. Pou sa, genyen 32 ekip ki te kalifye pou patisipe nan konpetisyon sa. Men malerezman Youn ladan yo, Club Léon, ki sòti nan peyi Meksik pap ladan l ankò. FIFA mete yo deyò.

Men, jodi vandredi a, FIFA bay nouvèl pou fè konnen yo retire klèb Léon an ki twouve li nan peyi Meksik. Òganizatè yo fè konnen y ap genyen pou di ki fòmasyon k ap ranplase yo san pran tan.

Aprè klèb Léon an te jwenn biyè kalifikasyon pou premye edisyon Koup Dimond klèb la, gwoup ki responsab pou fè respekte disiplin nan koze foutbòl la te louvri yon ankèt kont CF Pachuca e klèb León an. Nan sans sa, prezidan komisyon disiplin FIFA te pran desizyon pou voye dosye a dirèkteman bay komisyon rekou FIFA pandan li aji selon Atik 56, liy 3 Kòd disiplinè a. aprè prezidan komisyon rekou a fin analize dosye yo, antèt la te di CF Pachuca ki nan gwoup D a plis klèb León an ki okipe gwoup H la pa ranpli kritè sou koze pwopriyete miltiklèb la selon sa atik 10 paragraf 1 nan règ FIFA mete pou mondyal klèb 2025 lan.

Nan detay yo bay sou dosye sa, yo fè konnen :" konsènan pwopriyete miltiklèb la, se yon lwa ki di yon sèl moun, antrepriz ou menm fanmi pa kapab genyen 2 klèb patisipe nan konpetisyon an. E 2 klèb meksiken sa yo ki kalifye pou jwe premye edisyon mondyal klèb yo twouve yo sou responsablite gwoup sa ki genyen non "Grupo Pachuca" li genyen nan tèt li Jesús Martínez Murguia kòm prezidan. Pou fè respekte prensip la, dirijan yo rale atik 10 liy 4 nan règleman Koup Dimond klèb FIFA 2025 la kote FIFA fè konnen yo retire klèb Léon an nan gwo evènman sa. Yo ajoute pou fè konnen nan yon ti bout tan, n ap anonse ranplasan li".

Se sa prezidan rekou FIFA fè konnen aprè yo te rive swiv e analize dosye ènpòtan sa.

KÒMANTÈ

Dènye atik yo